ALL ROUNDER

                                       All  Rounder    

കറിക്കരിയാം , പച്ചക്കറികൾ  കൊത്തിക്കൊത്തി നുറുക്കാം, 

തൊലി ചുരണ്ടാം ,

കുലച്ചു മൂത്ത് തഴച്ചു  പരുവപ്പെട്ടതെന്തും 

വെട്ടിയെടുക്കാം ..

തുഞ്ചം കൊണ്ടൊരു screw driver  ആയി ,

പിരി ലൂസായ തവയുടെ  screw  മുറുക്കാം ..

പൊള്ളി പ്പൊന്തുന്ന  പപ്പടത്തിനെ കുത്തിക്കോരാം ,

കയ്പ്പും ചവർപ്പും പുളിയും തിരഞ്ഞു നീക്കി 

മധുരം മാത്രം മുറിച്ചെടുത്തു, കൃത്യമായി  പങ്കുവെയ്ക്കാം ..

അച്ഛന് ,മോൾക്ക്‌ , മോന്......

ആവി തിങ്ങി safety valve  പൊട്ടി പ്പോകാതെ ,

പണിമുടക്കിയ കുക്കറിൻറെ  weight ,

ചിലപ്പോഴൊക്കെ ഒന്നു പൊന്തിച്ചു കൊടുക്കാം ...

എന്തൊരാശ്വാസം ...!

പിന്നെ, തരം  പോലെ  ചൊറിയും മാന്താം ..

                                       ' വായ തേഞ്ഞ വാക്കത്തി പോലെ' ,

                                   എന്നെല്ലാരും അധിക്ഷേപിക്കുമെങ്കിലും 

തേഞ്ഞ മുന കാട്ടി, അത്യാവശ്യം  ഭീഷണിപ്പെടുത്താം..

അപ്പോൾ ...

അങ്ങനെയങ്ങനെ ..,

പാവം കറിക്കത്തിയൊരു   all rounder തന്നെ..

                                                    വീട്ടിൽ  അമ്മയെപ്പോലെ.....!!