ഇഷ്ടം
ഉരുക്കുന്ന അഗ്നിനാളത്തെക്കാൾ ,
ജ്വാലാ താപത്തിൽ,
സ്വയമുരുകി വെളിച്ചമാവുന്ന-
മെഴുകുതിരിയാണെനിക്കിഷ്ടം ....!
അഗ്നിയെരിഞ്ഞു കെട്ടുപോകിലും,
മെഴുകു ജന്മം തോൽവിയറിയുന്നില്ല..!
ഉരുകിയുറഞ്ഞു ഘനീഭവിക്കുന്ന -
ദൃഡ നിശ്ചയങ്ങൾ-
പുതു ജീവനായ് ഉയിർ തേടുന്നു...!
ചിരിച്ചു നില്ക്കുന്ന വസന്തത്തെക്കാൾ ,
ഫലപ്രാപ്തിക്കായി,
കൊഴിഞ്ഞു മണ്ണിലലിഞ്ഞ-
പൂക്കളെയാണെനിക്കിഷ്ടം..!
അലക്കിയെടുത്ത് ഇസ്തിരിയോടിച്ച
പൊള്ളത്തരങ്ങളെക്കാൾ,
ഓർമ്മക്കറകൾ മായാത്ത -
ഇസ്തിരിച്ചൂടിൽ നിവരാത്ത ,
ജീവിതത്തിൻറെ -
പരുക്കനുടുപ്പാണെനിക്കിഷ്ടം....!
ശീതീകരിച്ച നുണപ്പെരുക്കങ്ങളെക്കാൾ.,
പൊരിയുന്ന വെയിലിൻറെ ,
ഉച്ചി തിളപ്പിക്കും-
നേരുകളാണെനിക്കിഷ്ടം..!
ഉപേക്ഷിക്കപ്പെട്ട പരിശ്രമത്തെക്കാൾ.,
ഒരു കുഞ്ഞനുറുമ്പ്,
തനിയെ ചുമക്കുന്ന-
അരിമണിയാണെനിക്കിഷ്ടം ...!
മാളത്തിലൊളിക്കുന്ന ഭീരുത്വത്തെക്കാൾ-
ഇരുളിൽ,
ഒറ്റയ്ക്കു പറക്കുന്ന മിന്നാമിനുങ്ങിൻറെ -
ഇത്തിരി ജ്വാലയാണെനിക്കിഷ്ടം....!!
ishtam... valare valare adhikam ishtam... namovakam...
ReplyDelete