ഉണ്മ..

നീർച്ചാലു മാത്രമാണു ഞാൻ ..!
നീയെന്ന തെളിനീരിന്
നിറഞ്ഞൊഴുകുവാൻ... !
എന്റെ ഉള്ളാഴമല്ല നീ ..
എന്റെയിരുളാഴങ്ങളിൽ
തുളുമ്പി നിറയുന്ന
നിറവെളിച്ചം ..!
എന്റെ വാക്കുകളല്ല നീ ..
വാക്കിൽത്തുളുമ്പുന്ന
ജീവചൈതന്യത്തിന്റെയുറവ ..!
വെറും മണ്‍വിളക്കല്ല നീ ,
എന്റെ ഹൃദയജാലകച്ചില്ലിൽ ,
കരിപുരളാത്ത സ്വർണ്ണ ചിത്രങ്ങളെഴുതുന്ന
കാവൽവിളക്കിന്റെ
കെടാനാളം ..!
നിന്റെ കരുതലിന്റെ കരുണ താപത്തിൽ,
എന്റെയാത്മാവ്
നിന്നിലേക്ക്‌ ഉരുകി..
തുളുമ്പി വീണുകൊണ്ടിരിക്കുന്നു ..!
ഒന്നു മറ്റൊന്നിൽ വിലയിച്ച ..
ഒറ്റജ്വാലയാണ് ,
പുറമേ കാണുന്നത് ..!
പുറംകണ്ണ് കാണുന്നതൊക്കെയും തിരമാലകളെങ്കിലും ..
സമുദ്രമെന്നത് തിരമാലകൾ മാത്രമല്ലല്ലോ ..!
അനന്തമായ കാലത്തിന്റെ
മാല്യത്തിലേക്ക്..,
നിമിഷകണങ്ങൾ കോർത്തു ചേർത്ത് ..
ഇന്നിന്റെ മൊട്ടിൽനിന്ന്‌
നാളെയുടെ പൂ വിരിയുന്നു..!
നീയൊഴുകുന്നു ..
എന്നിൽ നിറഞ്ഞ്,
അങ്ങോളം..!
പിന്നെയും..!!
..